CEBU CITY — Nasignit sa mga sakop sa Mabolo Police Station ang usa ka 36-anyos nga lalaki niadtong Sabado, Mayo 23 sa hapon sa Cabantan St., Barangay Luz, dakbayan sa Sugbu tungod sa gipakitang kadudahang lihok.
Nailhan ang dinakpan nga si Sherwin Canete, minyo, ug taga Sityo Kalinaw sa naasoyng Barangay. Mokabat sa 100 grams o P680,000 ang balor sa gidudahang shabu ang nasakmit gikan sa posisyon ni Canete.
Matud sa nakadakop sa suspect nga si Patrolman Efren Delos Reyes Jr. nga nabantayan niyang nga nag-sigi og sulod-gawas ang suspect sa entrada sa control area maong iya kining gisita ug didto matud pa nipakita ug kadudahang lihok ang suspect maong iyang gi inspection ang dala niining plastic bag.
Nisugat sa panan-aw ni Delos Reyes ang pinakite nga brown shabu.
Sa habig sa dinakpan,giangkon niini ang kalambigitan sa ginadiling drugas apan midepensa kini nga bag-ohay pa siya sa maong dautang binuhatan.
Kasong paghupot ug gituohang shabu ang gikatakdang ipasaka batok sa dinakpan.
