BTS, gihimakak nga apil sa Michael Jackson tribute album

Kusganong gihimakak sa BigHit Music ang mga taho nga nalambigit ang BTS sa giingong tribute album alang sa anhing pop icon nga si Michael Jackson.

Naggikan ang report sa mantalaang The Irish Sun, diin si Paddy Dunning, ang tag-iya sa Grouse Lodge studio sa Ireland, niingon nga daw nag-record og kanta ang BTS alang sa maong proyekto.

Apan, giklaro usab sa BigHit Music nga ang BTS wala nakabisita sa Grouse Lodge Studio sa Ireland hinungdan nga wala miapil sa bisan unsang mga sesyon sa pagrekord alang sa nahisgutang proyekto.

Gidugang sa label company, nga mohimo sila og tukma nga mga lakang aron mapugngan ang pagkaylap sa mga sayup nga kasayuran bahin sa grupo.

Wala pay tubag ni Dunning o The Irish Sun sa pamahayag sa BigHit.