Gipanghimakak sa Bureau of Corrections (BuCor) nga ang kanhi mayor sa Bamban, Tarlac nga si Alice Guo nakadawat og special treatment.
Sumala ni BuCor Director General Gregorio Pio Catapang Jr., si Alice kasamtangang gipailalom sa mandatory nga lima ka adlaw nga quarantine period human sa iyang pagbalhin gikan sa Bureau of Jail Management and Penology (BJMP).
Gidugang usab niini, ang tanang persons deprived of liberty (PDL) gipailalom sa susamang mga regulasyon ug mga restriksyon, bisan unsa pa ang ilang kahimtang sa kinabuhi.
Ingon man nga gitugutan ang abogado sa kanhi mayo nga mobisita kaniya, basi kini sa mga protocol sa panglawas ug seguridad nga gisunod sa bureau.
Apan, gilimod sa BuCor nga ang kanhi mayor gihatagan og kahigayonan nga magamit ang iyang cellphone samtang anaa siya sa sulod sa prisohan.
Sumala ni Catapang, ang rekord sa prisohan bahin kang Guo ug uban pang mga binilanggo abli, subay sa pagpasiugda niini sa transparency ubos sa correctional system sa nasud.
