CEBU CITY- Gisusi karon sa Department of Education (DepEd)-7 ang kaso sa giingong bullying nga mitumaw sa Talamban National High School aron masuta ang tinuod nga kahimtang sa nahitabong insidente.
Matud ni Dr. Arturo Bayocot, Regional Director sa DepEd-7, dili pa sila makahatag sa eksaktong gidaghanon sa mga kaso tungod kay moagi pa kini sa validation pinaagi sa division, district ug sa eskwelahan sa dili pa mapamatud-an.
Gipasabot ni Bayocot nga nagkalain-laing lebel ang bullying ug ang matag reklamo kinahanglan hatagan og tukmang pagtagad pinaagi sa padayon nga guidance ug intervention sa mga magtutudlo ug mga opisyal sa eskwelahan.
Dugang sa opisyal, wala pa’y opisyal nga kumpirmasyon sa motibo sa nahitabong insidente, apan nag-awhag siya sa publiko nga likayan ang pagpatuyang sa mga espekulasyon samtang nagpadayon ang imbestigasyon.
Mipahimangno usab si Bayocot sa mga ginikanan nga dili lamang sa eskwelahan nagsugod ug natapos ang responsibilidad sa pag-amuma sa mga kabataan.
Giingon niyang importante ang 24/7 nga pagmonitor sa paggamit sa cellphone, online games ug ubang digital content nga mahimong makaimpluwensya sa pamatasan sa mga estudyante.
Gipasiugda pa niya nga ang paglikay sa bullying ug pagpanalipod sa mga kabataan usa ka hiniusang responsibilidad sa mga ginikanan, magtutudlo ug sa tibuok komunidad aron masiguro ang luwas ug maayong palibot sa pagkat-on.
