CEBU CITY – Nasikop ang usa ka buntis atol sa buybust operation kagabii sa Brgy. Sambag 2, Cebu City diin nakuhaan og shabu nga mobalor og dul-an 300,000 pesos ug boodle money nga mibalor og 14,000 pesos.
Natanggong karon sa Abellana Police Station si Jennifer Cabatingan, alyas Jen, 37 anyos nga dalaga, ug lumulupyo sa Sitio Cawayan, Sambag 2, Cebu City.
Hilom ug walay gibutyag nga impormasyon ang nadakpang buntis mahitungod sa tinubdan sa nasakmit nga shabu.
Wala magdahum ang kapulisan sa Abellana diin bulto-bulto ang nakuha nga shabu sa nahitabong buybust operations nga gipangulohan ni Police Chief Inspector Maria Teresa Macatangay.
Makig-alayon pa ang Abellana Police Station sa Drug Enforcement Unit sa Cebu City Police Office pagkonektar sa mga impormasyon mahitungod sa tinubdan sa shabu ug posibleng mga koneksyon.
