CEBU CITY- Nahadlok na matud pa nga matulog ang mga residente sa mga affected areas sa bush fire sa Australia tungod kay basin dili na nila mabantayan, malamoy na sa kayo ang ilang pinuy-anan.
Kini ang pamahayag sa usa ka Pinay nga si Gee Ann Fat kinsang nagpuyo karon sa New South Wales Australia sa dihang nahinabi sa Bombo Radyo Cebu. Kini nunot na usab sa makabalaka nga sitwasyon karon sa nasud nga Australia tungod sa bush fire.
Matud ni Fat nga tinu-ig kini nilang nasinatian apan kini karon ang giingong pinakagrabe kung diin nangahadlok na sila.
Duna na usab mga business establishments ang nanira gumikan sa padayon nga pagkatap sa kayo. Ug ila na usab gipang-withdraw ang ilang mga kwarta sa bangko gumikan kay gi-aluman nga manira na usab kini.
Dugang pa ni Fat nga bisan og gi-uwan na sila, wala pa gihapon napawong ang kayo ug nabalaka na siya ilabina nga ang iyang pinuy-anan ang naa sa bahin sa New South Wales nga maoy hilabihang naapektaran karon.
Gipatawag na usab sa Australian gov’t ang mga reserved army aron sa pagtabang kung diin lakip na niini ang asawa ni Fat. Apan gitino sa pinay nga gitagaan na sila og tabang sa gov’t ug ang bugtong mahimo nalang nila sa karon mao ang muhiklin.
Nanawagan usab kini sa publiko ug sa tibook kalibutan og pag-ampo alang sa kaluwasan sa nasud sa Australia. (with reports from Bombo Crislie Adlawan)
