LAPU-LAPU CITY-Patay ang usa ka businessman human nagpusil sa iyang kaugalingon sulod mismo sa iyang sakyanan tunga sa dalan sa Marcelo Fernan bridge sa Barangay Pusok, dakbayan sa Lapu-Lapu, Cebu, kaganinang kaadlawon.
Naila ang biktima nga si Ronald Degamo Tacgos, 40 anyos ug kanhi businessman.
Matud ni Police Master Sergeant Mary Jane Legara , ang imbestigador sa Lapu-Lapu City Police Station 5 nga dunay kanhi negosyo ang biktima apan na bankrupt tungod sa pagkagumon niini sa sugal.
Dugang pa ni PMSgt. Legara nga dunay nakuha nga suicide note kung diin nakasuwat dinhi ang dakong kahi-ubos sa iyang ginikanan human nga wala kini pahulama og kwarta.
Gikataho nga dunay gihambin nga depresyon ang biktima tungod sa utang ug problema sa pamilya.
Giprenda na usab matud pa sa biktima ang balay niini sa bangko nga nagkantidad og P5 million ug gibayran ra usab sa iyang igsoon.
Nasayran nga gikan pa sa casino kagabii ang biktima sa wala pa kini nagpakamatay.
Narekober sa kapulisan ang .38 caliber pistol sulod sa sakyanan kung diin gitoohang gigamit sa pagpakamatay niini ug dunay usab kini nakitang samad pinusilan sa iyang dughan.
