CEBU CITY – Gikalipay sa Regional Director sa Land Transportation Office (LTO-Region 7) nga si Victor Caindec ang nahimong desisyon sa City Prosecutor sa Lapu-Lapu City nga panubagon ang mga motorcyle dealer nga nameke og mga dokumento arun lang makabaligya og motor.
Matud pa ni Lapu-Lapu City Prosecutor Atty. Ruso Zaragoza nga iyahang girekomendar ang duha ka counts sa kalapasan sa Republic Act 10175 o ang Anti-Cybercrime Prevention Act of 2012 ug ang kalapasan usab sa Article 172 sa Revised Penal Code o Falsification of public documents batok nilang Marvin Ken Du, Carl Ryan Lim, Iwih Jane Du, ug Cassandra Alexis Du, kinsang mga executives sa DES Marketing.
Gihimug-atan ni Caindec nga sakto na ang pagpalumbong sa kining mga dealers kay dili lang sila naka-trampas sa gobyerno ilabi na ang pagpameke og dokumento arun lang dili makabayad sa saktung buwis kay naka-trampas usab kini sa mga pobre nga naglisod og bayad sa mga inutang nga motor.
Dugang pa niini nga klaro kaayo nanikas ang maong dealer diin sa tubag pa sa respondent kay igo lang kini nagtuyok-tuyok ug wala gihatagan og bili ang gilabay nga reklamo sama sa duha ka sales invoice, ang usa kay sa kustomer ug ang ikaduha kay sa LTO nga parehong kontrobersyal.
Tataw pa ni Caindec, nagpareho lang ang detalye sa duha ka resibo apan lahi ang petsa ug ang lugar kung asa kini napalit butang nga klaro kining gi-peke arun makalikay sa pagbayad sa buwis ug maka-trampas na usab sa katungod sa mga ilahang mga kustomer.// ekp
