Gisusi sa Commission on Elections (Comelec) ang mga kontribusyon sa kampanya gikan sa mga kontraktor sa gobyerno sa 2025 midterm elections, lakip ang posibleng donor gikan sa Rehiyon 7.
Matud ni Comelec Region 7 Director Francisco Pobe, nga ang mga contractor mahimong maapil sa listahan sa mga donor nga gi-review, bisan og dili niya makompirmar ang mga detalye.
Giklaro usab ni Pobe nga legal ang pribadong donasyon. Apan, ang mga isyu motungha kung ang mga kandidato mapakyas sa pagpakita sa mga kontribusyon sa ilang Statement of Contributions and Expenditures (SOCE) o kung ang usa ka donor adunay legal nga mga butang nga makaapekto sa politiko.
Gipasabot ni Pobe nga ang mga donasyon mismo gikonsiderar nga balido.
Dugang pa niini nga ang magdepende kini kung husto ba gayud ang pagrecord sa mga kontribusyon sa ilang mga Statement of Contributions and Expenditures ug kung ang mga donor legal ba nga kuwalipikado.
Gihimug-atan usab ni Pobe nga ang tahas sa field office limitado lamang sa pag-verify sa pagkakompleto sa mga gisumiter, samtang ang central office sa Manila ang responsable sa pagsusi sa ilang katukma sa mga dokumento.
Samtang sa pikas bahin, gibuksan na usab sa Comelec 7 ang voter registration alang sa umaabot nga Barangay ug Sangguniang Kabataan Elections (BSKE), nga nagsugod sa Oktubre 20, 2025, hangtod sa Mayo 18, 2026.
Orihinal nga gitakda sa Disyembre 1, 2025, ang BSKE apan gi-postpone sa Nobyembre 2, 2026, ubos sa balaod nga gipirmahan ni Pres. Ferdinand Marcos Jr.
Matod ni Pobe nga ang kausaban sa eskedyul nagtumong sa pagpataas sa voter turnout pinaagi sa pag-align sa eleksyon sa pagpauli sa mga residente alang sa panahon sa kalag-kalag.
