CANADA- Gi-anunsyo sa Canada nga putlon niini ang mga permit sa international student sa sunod tuig, ug hugtan ang mga lagda sa mga langyaw nga trabahante aron mapaubos pa ang gidaghanon sa mga temporaryo nga residente sa nasud.
Tumong sa maong lakang nga mo kunhod ang populasyon sa maong nasud gumikan sa imigrasyon nga nagduso sa populasyon sa Canada ngadto sa 41 milyon sa sayo pa ning tuiga.
Gipunting ni Prime Minister Justin Trudeau ang taas nga imigrasyon nga nagpalisud sa sektor sa pabalay, trabaho ug social service sa nasud.
Sa 2025, ang Ottawa nagplano nga mag-isyu sa 437,000 nga mga student permit ngadto sa international student gikan sa 485,000 karong tuiga ug labaw pa sa 500,000 sa 2023.
Dugang pa sa Ottawa nga makunhuran ang ihap sa mga temporaryong residente ngadto sa 5% sa populasyon, gikan sa 6.8% kaniadtong Abril.
