CEBU CITY-Gikwestyon sa grupong Carbon-hanong Alyansa ang legalidad sa backfilling project duol sa viaduct sa South Road Properties ug Carbon market redevelopment, nga nangutana sa Cebu City Government kon niagi ba sa competitive bidding ang maong aktibidad.
Gumikan kay ang nagpadayon nga backfilling project nahimutang sa luyo nga bahin sa mechanical parking area ug duol sa gikaaway nga Compania Maritima area nga giangkon sa Cebu Port Authority ug Cebu City Government nga tag-iya niini.
Kung kahinumduman niadtong Hulyo 3, 2023, ang Carbon-hanong Alyansa nagpahayag ug mga kabalaka pinaagi sa usa ka post sa Facebook bahin sa mga hungihong nga pipila ka mga tenant gikan sa The Barracks ang ibalhin sa backfilled nga proyekto.
Matud pa ni Winefredo Mero, ang Pangu sa Carbon-hanong Alyansa nga klaro kaayo nga reclaimation ang gibuhat sa maong lugar gumikan kay gitambakan kini ug yuta sukwahi sa backfilling nga kawton ang yuta unya ibalik ra usab.
Apil usab sa gikwestiyon sa Carbon-hanong Alyansa ang legalidad sa proyekto ug kon niagi ba kini sa open and competitive bidding process ingun man nga naglibug usab sila kung nganong gi reclaim ang maong lugar ug unsay katuyoan sa maong proyekto.
