CEBU CITY — Gihimug-atan sa habig sa mga mamaligyaay sa Carbon Public Market nga pabor sila sa pag-modernize sa merkado apan supak sila sa pag-privatize niini.
Gitubag ni Erwin Goc-ong, ang chairman sa CEMVEDCO, sa mga nag-unang mga kabalaka sa mga manindahay sa merkado ning naghinangat nga pagpatukod niini.
Matud ni Goc-ong nga gusto silang makakita sa mismong joint venture agreement nga gipirmahan sa Cebu City Government sa contractor nga GMR Megawide.
Kini gumikan kay aduna kini kopya sa mismong kasabutan apan dili kini pirmado sa managlahing habig.
Dugang pa ni Goc-ong nga nisuway sila sa pagpangayo og kopya sa maong kasabutan apan nagdumili ang kagamhanan sa dakbayan gumikan sa confidentiality niini.
Komitiba alang sa kontrata
Tinguha karon sa habig sa mga manindahay sa Carbon Public Market nga mag-umol og public market oversight committee aron subayon ang dagan sa pagpatukod sa bag-ong merkado.
Matud ni Goc-ong nga magagikan ang mga myembro sa maong komitiba gikan sa Cebu City Government, ang contractor nga GMR Megawide, mga barangay officials, ug pipila ka mga manindahay sa Carbon Public Market.
Pinaagi niini, mahatagan og kasulbaran ang mga naglimin nga suliran kabahin sa gikabalak-ang privatization sa merkado sulod sa 50 ka tuig.
Samtang gihimug-atan ni Goc-ong nga kinahanglang mag-angay ang managlahing habig aron padayon ang pagpanikaysikay sa mga manindahay sa maong merkado. (with reports by Bombo Benjie Tanghiyan)
