CEBU CITY- Nadugta ug nanimaho nang nakit-an ang patayng lawas sa usa ka caretaker sa mga manok igtatari nga giingong gipatay ug gilubong sa iyang mga kauban sulod sa compound sa usa ka game farm, gabii, Agosto 27, 2025.
Giila ang biktima nga si Jovani Bonghanoy nailhan sa alyas nga “Bani”, 46-anyos, caretaker og mga manok pang derby, ug residente sa Lower Lobres, Brgy. Pung-ol Sibugay, Cebu City diin nahimutang ang gamefarm nga iyang gitrabahoan.
Basi sa inisyal nga impormasyon, katapusang nakit-an ang biktima nga nag-inom kauban ang gwardiya sa game farm nga si Jonathan Leoligao, ug tulo ka mga bag-ong trabahante nga mga batan-ong lalaki nga si alyas “Jay”, 21-anyos, “Mark” 19-anyos, ug “Riz” 16-anyos sa guard house niadtong milabay nga domingo, Agosto 24, 2025.
Unang impormasyon nga gipaambit ni Leoligao nga ang biktima nga si “Bani” nigawas sa farm ug didto wala na kini nakit-an pagbalik.
Atol sa ilang pagpangita, ilang nabantayan ang bag-ong nakubkob nga yuta diin sa ilang pagkawt nakita ang padung nang madugta nga patayng lawas ni Bonghanoy nga gisulod og sako.
Sa inisyal nga imbestigasyon sa kapulisan sa Malubog inubanan sa Scene of the Crime Operatives, nasayran nga adunay samad sa liog ang biktima ug anaa na kini sa advance state of decomposition diin lisod na nga ihaw-as sa iyang gikalubngan.
Apan sa pagpalawm sa pakisusi maong panghitabo, nasuta nga usa kini ka linoog nga krimen, gumikan sa pagkumpisal sa tulo ka mga batan-ong lalaki, positibo nila nga gitudlo ang guwardiya nga si Jonathan Leoligao nga giingong maoy nipatay sa biktima ug misugo kanila sa pagdala, pagkawt, ug paglubong sa patayng lawas sa biktima niadtong domingo sa hapon.
Ingon man nga kalit usab nga nawala si Leoligao nga nitabang pa og pagpangita sa biktima sa dihang mas nialwm pa ang kagabhion nga karon mao nay gikonsiderar nga person of interest.
Sa pagkakaron padayon ang hot pursuit operation batok sa person of interest. Samtang ang kabanay ni Bonghanoy nanawagan sa dinalian nga pagkadakop sa giingong mipatay kang Bani ug pagkaresolbar sa mao nga kaso. | Bombo Rexmond Omega
