Gibutyag sa Presidential Anti-Organized Crime Commission (PAOCC) nga si Cassandra Li Ong, ang awtorisado nga representante sa gi-raid ug gisirad-an nga Philippine Offshore Gaming Operator (POGO) hub nga Lucky South 99 sa Porac, Pampanga, kay katapusang namatyagan sa Japan.
Sa usa ka press conference niadtong Sabado,Nobyembre 22 ang tigpamaba sa PAOCC nga si Winston Casio miingon nga si Ong miadto sa Japan sa unang quarter sa 2025 human siya gibuhian gikan sa detensyon sa Senado.
Bisan pa, giangkon sa opisyal nga human siya nasubay sa Japan, wala silay ideya kung asa miadto si Cassie Ong.
Miingon siya nga usa ka warrant of arrest ang gi-isyu batok kang Ong niadtong Marso o Mayo rong tuiga.
Bisan pa, sumala sa opisyal sa PAOCC, si Ong gipailalom na sa Interpol Red Notice ug ang ilang opisina karon nakig-alayon sa ubang mga ahensya sa pagpatuman sa balaod aron makit-an si Ong ug madala siya balik sa Pilipinas.
Miingon siya nga ang pagkanselar sa pasaporte ni Ong anaa na sa Department of Foreign Affairs (DFA).
Kahinumduman nga unang gitaho nga wala na sa Pilipinas si Ong sa dihang gibutyag kini ni Senador Sherwin Gatchalian atol sa sesyon sa Senado niadtong Biyernes, Nobyembre 21.
Sumala sa Senador, gibuhian si Ong atol sa transisyon tali sa 19th ngadto sa 20th Congress.
Gipasabot sa Senador nga gibuhian si Cassie Ong human natapos ang ika-19 nga Kongreso tungod kay walay mga kaso nga gisang-at batok kaniya niadtong panahona.
Sa pagkakaron, adunay nagpaabot nga warrant of arrest batok kang Ong kalabot sa usa ka qualified human trafficking case.
