Nanawagan si Miss Universe 2018 Catriona Gray sa Miss Universe Organization (MUO) nga ipatuman ang mas klaro ug mas transparent nga proseso sa judging sa umaabot nga mga pageant, human sa kontrobersiya ug mga alegasyon sa pagpanikas naglibot sa kadaugan ni Fatima Bosch sa Mexico rong bag-ohay lang.
Sa iyang Instagram Broadcast Channel, si Catriona miingon nga ang MUO kinahanglan nga ibalik ang pagsalig sa mga fans sa pageant pinaagi sa pag-establisar og klaro nga mga criteria, usa ka scoring system, ug pagkuha og independent third-party tabulator.
Miingon siya nga ang mga report sa mga mi-resign nga mga hurado ug giingong kalibog sa proseso sa paghukom makapahigawad.
Bisan pa, nasubo si Catriona sa online nga pagdumot nga nadawat ni Bosch, ug naglaum nga gamiton sa bag-ong Miss Universe ang iyang titulo alang sa positibo nga adbokasiya.
Gidayeg usab niya ang mga pasundayag ni Ahtisa Manalo sa Pilipinas ug Olivia Yacé sa Côte d’Ivoire (Ivory Coast) sa Q&A, nga iyang giisip nga labing kusgan. Miingon usab siya nga ang katapusang pangutana “basic” ug nga ang mga kandidato gilauman nga andam alang niini.
Dugang ni Catriona nga base sa iyang kasinatian isip usa ka hurado, managlahi gyud ang “gusto” sa mga hurado, apan iyang giinsistir nga ang transparency mao ang yawe aron malikayan ang pagduhaduha sa resulta sa kompetisyon.
