CEBU – Nipadayag sa iyahang kasubo si Sen. Pia Cayetano, atol sa plenary session niadtong Martes sa First Regular Session sa 19th Congress Hulyo 26, 2022, human mahimong balaod ang Vape Regulation Bill, nga walay hunong nga iyang gisupak niadtong pa sa 18th Congress.
Kahinumduman nga Enero 26 ning tuiga, gi-aprobahan sa Senado ug House of Representatives ang maong lakang.
Matod ni Cayetano, gisumiter ang maong lakang sa Malacañang tulo ka adlaw sa wala pa mobiya si Presidente Rodrigo Duterte sa Malacañang, o lima ka buwan human kini napasar sa Kongreso.
Samtang sa habig sa Malacañang, gitugotan ni President Ferdinand “Bongbong” Marcos Jr. nga mahimong balaod ang maong balaudnon niadtong Hulyo 25 bisan paman wala ang pirma sa presidente.
Gibutyag ni Cayetano nga ang pagdayag sa iyahang kasagmuyo sa pagpasar sa maong balaudnon ug ang wala pag-veto sa presidente dili makahatag og hustisya sa milyon-milyon ka kinabuhi nga mabutang sa kadaot tungod sa Vape Law.
Gidugang sa senador nga daw sama sa nadugmok ang kasing-kasing ug espirito niini apan dili kini mohunong sa pagpakigkumbate alang sa kahimsog ug kaayohan sa mga Pilipino.
