Gipangtangtang na ang mga bag-ong gitaod nga reflectorized road barriers human miresulta sa sunod-sunod nga aksidente sa mga motorsiklo nga miagi sa Osmena Blvd.
Kini subay sa mando ni Mayor Raymond Alvin Garcia nga tangtangon sulod sa 48 ka oras ang separator barrier nga gitaud niini sa Cebu Bus Rapid Transit (CBRT) lane.
Gani, personal kini nga gisusi sa mayor ug mao kini ang agi’g tubag sa nahitabong disgrasya sa labing menos 5 ka mga motorsiklo sa lainlaing mga higayon nga niresulta sa pagkaangol sa mga drayber niadtong Lunes, Pebrero 10, tungod kay wala sila makabantay sa mga barrier.
Gibutang sa kontraktor ang mga barrier aron maoy magbuwag sa mga lane alang sa CBRT Project ug agianan sa bus kung magsugod na sa pag-operate ang mga lane sa BRT, nga gitinguha nga walay makaagi nga mga pribadong sakyanan.
Ingon man nga nihangyo ang kontraktor kang Garcia nga kung hapit na mag-operate ang mga bus sa BRT ilaha na sab nga ibalik ang mga barrier ug miuyon ra ang opisyal.
Atol sa pakighinabi sa Bombo Radyo Cebu ngadto kang Atty. Kent Francesco Jongoy, ang assistant head sa CCTO diin nanghinaot kini nga sa pagtangtang sa tanang barriers kay mosunod usab ang mga motorista sa mga lagda sa trapiko sa maong dapit.
