Pagasugdan na sa Cebu City Anti-Mendicancy Office (CCAMO) ang pagpasaka og kaso batok sa mga makalapas sa Anti-Mendicancy Ordinance sa dakbayan.
Kini ang gisaysay ni John Ryan Lumayag, ang Executive Director sa Cebu City Anti-Mendicancy Office sa eksklusibong pakighinabi niini sa Bombo Radyo Cebu News Team.
Sumala pa ni Lumayag nga gibuhat kini nila nga aksyon isip pagtuman sa ordinansa nga karaan nang wala natagad ilabi na sa kadalanan sa syudad.
Asoy pa niini nga ilang gipang-rescue ang mga libud-suroy nga anaa sa kadalanan diin miabot na sa kapin 1,600 enforced mendicants ang ilang nasalbar inabagan sa mga sakop sa Department of Social Welfare and Services (DSWS).
Gihimo nila kini kay nakalagda sa balaod nga nakahatag og risgo sa kaluwasan sa mga libud-suroy ang sige og pangayo sa kadalanan ingon man ang ilang pagsalig sa inadlaw-adlaw nga pangita sa pagpangayo sa mga pedestrian ug motorista.
Nasuta sa ilang record nga balik-balik na ang uban nilang mga mendicants nga masalbar diin dili pa gani taga-dakbayan sa Sugbo ang kadaghanan apan taga-Zamboanga sa Mindanao.
Dugang pa ni Lumayag nga base sa ilang enforcement operations, nasuta nga kadaghanan sa mga libud-suroy sa kadalanan kay gihimo nang negosyo ang pagpangayo ilabi na karong panahon sa Pasko, Bag-ong Tuig, ug Sinulog sa pagpanghimulos sa kahumok sa kasing-kasing sa mga tawo.
Ang Anti-Mendicany Ordinance sa dakbayan (Cebu City Ordinance 1631) kay naglatid og silot o fine sa P300 sa first offense, P500 sa second offense, ug third offense sa P1,000. Ingon man sa imprisonment sa 10 ka adlaw sa first offense, 20 ka adlaw sa second offense, ug usa ka buwan sa third offense.
Gihangyo sa opisyal ang publiko nga dili na muhatag sa mga libud-suroy sa kadalanan aron sa pagtuman sa lagda sa balaod ug sa pagtinguha na hipos na sila tungod kay walay manglimos kung walay muhatag. Kung ganahan man muhatag og kaayuhan sa isig ka-tawo kay ipaagi kini sa mga buhatan sa gobyerno o mga non-government organizations aron han-ay ang mga humanitarian acts ug dili makarisgo sa kaluwasan ingon man mahimuslan sa bati nga tumong.
