Padayon nga nakig kombati ang Cebu City Disaster Risk Reduction Management Office (CCDRRMO) sa ilahang ikaduhang adlaw sa Iligan City, aron sa pag tabang sa clearing operations, human gibinlan og grabing kadaot ang nahisgutang lugar nunot sa pag-igo sa Bagyong Basyang niadtong milabayng semana.
Atol sa ekslusibong pakighinabi sa Bombo Radyo Cebu Newsteam kang Ferl-john Pacaldo, ang Operations Response Head sa CCDRRMO, naa sila kasamtangang nahimutang sa Brgy. Mahayahay, Iligan City, kung diin maoy groundzero sa maong syudad human sa pagkuso-kuso sa bagyo.
Dugang pa ni Pacaldo, nakita nila nga walay kalahian ang kadaot nga gibilin ni Bagyong Tino sa Dakbayan sa Sugbo niadtong Nobyembre 4, 2025, ug ang kadaot nga gibilin ni Bagyong Basyang ngadto sa syudad sa Iligan.
Gikabutyag usab ni Pacaldo, nga lapad ang ilahang gikinahanglang operasyon gumikan kay dagko ang mga debris ang ilahang pangkuhaon nga naa sa mga kadalanan nagbabag, human gianod sa tubig-baha.
Dugang pa niya nga gawas sa mga dagko nga debris adunay baga nga lapok usab ang nagkatag sa kadalanan bunga sa gibilin sa tubig-baha.
Gani, iyang naasoy ang mga nasugatan nila nga mga hagit sama nalang sa kung asa nila ipa washout ang nahabilin nga tubig o wala nihubas nga tubig, gumikan kay dili na kini kaya sa drainage sa maong lugar.
Samtang, wala usab nalimod ni Pacaldo nga posible muabot sa 1 ka buwan ang maong clearing operations tungod sa grabing kadaot nga nahiaguman sa maong syudad.
Apan matud pa piya, bisan paman posibling muabot ug usa ka buwan ang maong operation nag-agad lamang sila sa kamanduan sa lokal nga kagamhanan sa Iligan City.
