Gisusi sa Kagamhanan sa Dakbayan sa Sugbo, uban ni Senator JV Ejercito ang Cebu City Medical Center (CCMC) niadtong Agosto 14, 2026, aron masuta ang mga pasilidad, serbisyo, ug kasamtangang kapasidad sa ospital.
Ang pagbisita naghatag og oportunidad nga personal nga masusi ang kasamtangang kondisyon sa medical facilty sa siyudad ug mailhan ang mga lugar nga nanginahanglan og padayon nga atensyon ug suporta.
Si Mayor Archival ug Senador Ejercito, usa ka lig-on nga tigpasiugda sa kalamboan sa panglawas, giubanan sa mga top management sa CCMC atol sa walkthrough samtang ilang gisusi ang mga importanteng lawak sa ospital ug gihisgutan ang nagpadayon nga mga paningkamot aron mapalig-on ang paghatag og panglawas alang sa mga residente sa Dakbayan sa Sugbo.
Matud ni Archival, ang pagbisita nagpasiugda sa kamahinungdanon sa hugot nga koordinasyon tali sa lokal ug national government sa pagpadayon sa mga proyekto sa panglawas nga direktang makabenepisyo sa mga Sugbuanon.
Gipasiugda niini ang pasalig sa siyudad sa pagsiguro nga ang CCMC mahimong mas lig-on, mas accessible, ug responsive nga pasilidad sa pag-atiman sa panglawas alang sa mga Sugbuanon.
Samtang sa pikas bahin, misaad usab si Senator JV Ejercito, nga moabag siya sa pagpahuman sa mga tambalanan sa Probinsya sa Sugbo, lakip na ang unang nabsita sa opisyal, kauban ni Gov. Pamela Baricuatro ang Hospital sa Danao nga lauman nga makadawat og P100 Million.
Dugang usab niini, nga gawas sa Hospital sa Danao, lakip nga mahatagan sa national budget ang mga tambalanan sa Dakbayan sa Car-car, Minglanila. Vicente Sotto Medical Center ug ang Cebu City Medical Center alang sa pagpalapad ug pagpalambo sa mga serbisyo niini.
Gikalipay usab sa Senador ang pagpahatag ug pagtagad sa Kagamhanan sa Probinsya sa Sugbo ug sa Dakbayan sa health care system.
