CEBU CITY- Nagpatuman ang Cebu City Police Office (CCPO) og komprehensibong mga lakang, samtang ang lokal ug internasyonal nga mga bisita modagsa sa dakbayan sa Sugbo alang sa Semana Santa 2025.
Kini nga lakang gihimo aron masiguro ang luwas ug malinawon nga pag-obserbar nga pagsaulog sa Semana Santa.
Ubos sa pagpangulo ni PCOL Enrico E Figueroa, Acting City Director, ang CCPO midugang sa presensya sa kapulisan sa tanang kritikal nga lugar, lakip na ang mga pantalan, bus terminal, shopping malls, ug mga hotel.
Liboan ka mga police personnel usab ang aktibo karon nga gipakatap uban sa mga boluntaryo ug force multipliers sa tibuok siyudad.
Subay niini, ang CCPO nag-apod-apod usab og “CCPO Care Kits” Kini nga mga kit, adunay mga bitamina, tambal, binotelyang tubig, premium nga kape, ug uban pang mga kinahanglanon.
Dugang pa, giapod-apod kini sa mga frontline workers, security personnel, ug mga myembro sa Philippine National Police nga walay kakapoy nga nagtrabaho karong Semana Santa.
Matod ni PCOL Figueroa, prayoridad nila ang pagsiguro nga ang tanan makasaulog sa Semana Santa nga adunay kalinaw sa hunahuna ug seguridad.
