CEBU CITY-Naka-full alert status na ang Cebu City Police Office (CCPO) alang sa Palarong Pambansa 2024 nga opisyal nang sugdan sunod semana.
Sa pakighinabi sa Bombo Newsteam kang Police Colonel Ireneo B. Dalogdog ang City Director sa CCPO, gitino niini nga kini subay sa ilahang pagpangandam alang sa dakong kalihokan, kana gumikan kay anaa sa 15,000 ka mga bisita gipaabot nga moabot sa dakbayan karong weekend.
Matud pa ni Dalogdog, nga adunay kinatibuk-ang otsenta ka personnel gikan sa Regional Mobile Force Battalion sa Central Visayas (RMFB-7) ang gipakatap sa baynte nga billeting areas sukad niadtong Biyernes, Hunyo 28 aron masiguro ang seguridad ug kaluwasan sa mga delegado.
Subay niini, gihangyo ni Dalogdog ang publiko nga sabton ang posibleng kahuot sa trapiko sa pipila ka dapit sa dakbayan dungan sa pag-abli sa National Games.
Hinungdan nga nangayo kini og konsiderasyon sa publiko ug ipakita sa mga bisita ang kaanindot sa dakbayan.
Giawhag usab sa kapolisan sa dakbayan sa Sugbo ang mga tumatan-aw nga likayan ang pagdala og dagkong mga backpack aron malikayan ang kahasol samtang mag-frisking sa entrance sa venue.
