CEBU – Gihangop sa Cebu City Police Office (CCPO) ang pahibawo ni Mayor Michael Rama nga doblehon ang binuwan nga allowance sa mga pulis gikan sa P2,500 ngadto sa P5,000.
Matod ni Lieutenant Colonel Wilbert Parilla, deputy city director for administration sa CCPO, ilaha usab nga nasayran nga nihangyo usab si Rama sa City Council nga iapil sa ilang budget alang sa sunod tuig ang umento sa allowance sa kapulisan, ug nidugang kini nga makapausbaw usab sa ilang moral.
Paghulagway ni Parilla nga madasig usab niini ang ilang ginsakopan nga doblehon ang ilang paningkamot sa paghimo sa ilang mga trabaho.
Gitino sa opisyal nga haom ang P2,500 nga usbaw nga allowance sa mga police personnel sa dakbayan tungod sa ilang ka-busy kon itandi sa ubang mga polis sa ubang police stations sa Central Visayas.
Nasayran nga gikinahanglan nga motrabaho ang kapulisan sa dakbayn sa Sugbo og 12 ka oras kada adlaw tungod sa kadaghan sa mga insidente nga kinahanglan nilang tubagon.
