CEBU CITY- Nipahigayon og inventory ug disposal ang Cebu City Police Office (CCPO) sa mga nasakmit nga pabuto ug pyrotechnic devices nga mobalor og Php 34,100.00 sa CCPO Parade Grounds, karung adlawa Enero 7, 2025.
Kini gipangunahan ni PLTCOL MARIA THERESA MACATANGAY, Deputy City Director for Operations, nga naglambigit sa mga personahe gikan sa nagkalain-laing police units ug naobserbahan sa media, nga nagpasiugda sa police transparency.
Sa pakighinabi sa Bombo Newsteam kang Police Lieutenant Colonel Macatangay, gitino niini nga ang mga butang nasakmit tungod sa paglapas sa mga regulasyon sa mga permit sa pagpamaligya ug dili awtorisado nga mga lokasyon sa pagpamaligya, paglapas sa Republic Act 7183 ug Executive Order No. 26 Series of 2024 nga giisyu sa kagamhanan sa dakbayan sa Sugbo.
Kini nga kalihokan nagpasiugda sa pasalig sa CCPO sa kaluwasan sa publiko ug pagpatuman sa balaod bahin sa mga peligrosong materyales.
Kung kahinumduman, nga una na nga gipangsusi sa Cebu City Police Office (CCPO) ang firecracker zone sa dakbayan sa Sugbo nga nahimutang sa South Road Properties (SRP), niadtong December 27, 2024.
Kini gipangunahan ni Police Colonel Antonietto Cañete ang City director sa Cebu City Police Office (CCPO) uban ni Police Lieutenant Colonel Jeffrey Bilaro, hepe sa Regional Civil Security Unit sa Central Visayas.
Tumong niini, aron masiguro nga masunod ang safety regulations, lima ka adlawa sa dili pa ang Bag-ong Tuig.
