CEBU CITY-Gihatagan og pagtugot ni Cebu City Acting Mayor Raymond Alvin Garcia ang hangyo sa Cebu City Sports Center (CCSC) management board nga aduna lang gihapoy bahin sa track oval nga padayon nga abli alang sa publiko higayon nga magsugod na ang pag-ayo niini.
Kini human nibisita kaniya ang mga opisyal sa CCSC, nga gipangulohan ni CCSC Manager Jovita Taburada, alang sa pagpanumpa sa duha ka bag-ong sakop sa board diin gilakip nalang sab nila ang pagpadangat ang maong hangyo atol sa okasyon.
Daan nang gipahibawo ni Acting Mayor Garcia nga pasirad-an ang CCSC pagkahuman sa Pasigarbo sa Sugbo sa umaabot Agusto 25 ug 26 aron hingpit kining ipaayo.
Nahukman atol sa maong panagtagbo nga adunay bahin sa rubberized track oval nga ipagamit gihapon sa mga tawo samtang giayo ang lain nga bahin niini.
Kahinumduman nga daan nang gihangop ang pag-abli sa CCSC ngadto sa publiko human sa pasiunang pag-ayo alang sa Palarong Pambansa niadtong buwan sa Hulyo.
