CEBU CITY- Giklaro ni Raquel Arce, pangulo sa Cebu City Transportation Office (CCTO), nga naresolba na ang kaso sa usa ka truck driver nga nireklamo sa pagpanakop sa usa ka sakop sa CCTO tungod sa pagka-flat sa iyang ligid sa kadalanan sa South Road Properties.
Matud ni Arce, gibalik sa buhatan ang bayad sa penalty sa truck driver human napamatud-an nga nasipyat ang personnel sa CCTO nga nag-isyu sa penalty. Wala man diay nag-parking ang truck sa daplin inay na-flattan lang kini sa ligid.
Base sa imbestigasyon, wala kini nakababag sa trapiko, hinungdan nga giprangkahan ang CCTO personnel nga nasipyat sa ilang aksyon batok sa driver.
Apan miangkon si Arce nga nasakitan siya sa gibuhat sa driver tungod kay gi-upload dayon ang video sa social media, nga nakadaot sa imahe sa organisasyon.
Gidugang niya nga angay hatagan og higayon ang buhatan sa pagpasabot sa mga susamang reklamo imbis nga ilahus dayon sa social media, tungod kay makamugna kini og kagubot ug makaguba sa reputasyon sa partido.
Gihimug-atan usab ni Arce nga istrikto nga isyuhan sa CCTO ang mga motorista nga makabalda sa trapiko, labi na sa SRP Viaduct nga adunay duha ra ka lane ug walay sidewalk.
Gipahinumduman usab niya ang mga motorista sa ilang responsibilidad sa pagsusi kon roadworthy ba ang ilang sakyanan sa biyahe.
Sa laing bahin, ipahigayon usab ang refresher courses sa mga CCTO personnel nga nasipyat aron mapalambo ang ilang serbisyo ug maibalik sa hustong dalan ang ilang tahas.
