Miluwat og Cease and Desist Order ang buhatan sa Prevention, Restoration, Order, Beautification, and Enhancement (PROBE) ug Cebu City Environment and Natural Resources Office (CCENRO) aron sa pagpahunong sa quarry operation sa bukirang bahin sa Barangay Poblacion Pardo ning dakbayan sa Sugbo niadtong adlaw sa Huwebes, Agosto 7, 2025.
Ang maong kamanduan sa kagamhanang dakbayan nanukad sa kasayuran nga paglapas sa tulo (3) ka adlaw nga panahon isip lugway sukad nga gi-serve ang notisya niadtong Lunes, Agosto 4 batok sa quarry operator.
Gani giplastada niini ang usa ka tarpaulim sa maong Cease and Desist Order gikan sa PROBE ug CCENRO.
Kini aron sa pagpahibalo sa publiko kabahin sa giatubang nga legal action sa maong lugar.
Sumala pa ni Raquel Arce ang pangu sa Cebu City Transportation Office (CCTO) ug temporaryong overseer sa PROBE nga gipahigayon nila ang pagbutang sa tarpaulin nga nagpakita sa Cease and Desist Order batok sa operasyon sa hauling aron mareport sa publiko kung aduna pay kalihokan makitabo sa higayong wala pa masulbad ang kaso.
