CEBU- Gibuak ni Cebu 5th District Rep. ug Deputy Speaker Vincent Franco “Duke” Frasco ang iyang pagpakahilom sa iyang desisyon nga suportahan ang impeachment complaint batok kang Bise Presidente Sara Duterte.
Gikompirmar ni Frasco nga apil siya sa kapin sa 240 ka mga kongresista, o anaa sa 80 porsiyento sa House of Representatives, nga mibotar sa pagpasa sa reklamo ngadto sa Senado.
Sa usa ka recorded video atol sa usa sa iyang mga engagement sa iyang distrito, iyang gipasabot nga ang seryosong mga alegasyon batok ni Duterte, lakip ang giingong sayop nga paggamit sa confidential funds ug ang iyang mga pamahayag bahin sa hulga sa pagpatay kang Presidente Ferdinand Marcos Jr. ug first lady Liza Araneta-Marcos, nagkinahanglan og pormal nga pakisusi.
Dugang pa, nga importanteng ipatuman ang due process sa batakang balaod sa nasod og dili sa mga nanggawas nga mga sentimento online ilabi na sa mga panatiko sa pamilyang Duterte.
Sa pikas bahin, gipasabot ni Frasco nga nga kon mapakyas siya sa pag-apil sa majority sa pag-botar, posibleng ma-zero ang budget sa iyang buhatan ug sa tibuok 5th district.
“Tungod ninyo. Tungod sa atong mga programa, proyekto, kalambuan. Di nako marisgo atong mga programa, mga proyekto sa lungsod sa Liloan kung di ko mukuyog sa kadaghanan,” matud ni Frasco.
