Gipalaw ug giingnan pa og “nagsakay-sakay” lang ni Cebu Provincial Governor Pamela “Pam” Baricuatro si 5th District Representive Vincent Franco “Duke” Frasco human misugyot ang congressman nga palambuon ang Provincial Hospital sa dakbayan sa Danao nga sulod sa kinto distrito.
Si Frasco kay unang miduso sa House Bill No. 3313 sa pag-upgrade sa tambalanan sa Danao og nanghinaot kini og suporta gikan ni Baricuatro aron mas mapalambo pa ang serbisyong medikal niini sa tibuok kinto distrito ug amihanang Sugbo.
Ang maong balaudnon sab kay nagtinguha nga mahimong Level 2 hospital kini ug maila sa bag-ong pangan nga North Cebu Medical Center (NCMC).
Apan sa habig ni Baricuatro pinaagi sa press conference niini sa Kapitolyo niadtong Miyerkules, Agosto 13 nga daw “nagsakay-sakay” lang si Frasco sa tumong ug tinguha sa iyang pagdumala sa lalawigan sa pagpabaskog sa serbisyong medikal ilabi na sa mga tambalanang gidumala sa kagamhanang lalawigan nga giinutil sa nakalabayng administrasyon nga ugangan sa kongresista.
Dugang pa ni Baricuatro nga daw ang pagpalambo sa usa ka ospital kay wala nanginahanglan og legislative bill sa Kamara apan ang pagpasar sa mga gikinahanglang lagda sa Department of Health (DOH) sigon pa sa propesyonal nga opinyon ni Provincial Health Consultant Dr. Nikki Catalan.
Gani pasumbingay pa ni Baricuatro og nganong sauna nga “suroy-suroy” ra ang kanhi gobernador sa Sugbo nga si former Governor Gwendolyn Garcia.
Ingon man, namahayag nalang si Frasco pinaagi sa iyang social media account nga ipadaplin ang politika hangtod sa 2028 kay daw dili man siya palaaway ug miisa pa sa iyang kamot aron makigtambayayong sa kalamboan sa Sugbo ug mga Sugbuanon.
