Nipadangat sa iyang personal nga mensahe si Cebu Archbishop Alberto “Abet” Uy, nunot sa obserbasyon sa adlaw sa mga Santos ug sa mga Kalag.
Nakigdapit ug usab nag-awhag ang Arsobispo nga atol sa pag-obserbar sa adlaw sa mga Santos ug Kalag, nga makialayon sa tibuok simbahan ubos na sa kasaulogan sa labing bililhong adlaw.
Dugang niya nga karong adlawa, Nobyembre 1, angay nga pasidunggan ang mga Santos, ingun man mga balaang tao nga gideklarar sa Simbahan, kadtong gikonsiderar nga Santos sa paagi, ug ang mga katawhan nga naningkamot nga magpuyo sa kabubut-on sa Ginoo.
Ingun man ang pakig-uban ngadto kanila pamaagi sa pag-ampo ug paghandom kanila, inubanan sa panghinaot nga matag usa sa mga nahisgutan, madasig nga mosubay sa tagsa-tagsang gipanag-ingnan, ug makabaton og balaan nga kinabuhi.
Gihatagan usab og importansya ni Archbishop Uy ang adlaw sa mga Patay, susama sa paghatag og importansya sa paghalad og pag-ampo alang sa kapahulayang dayun sa matag minahal sa kinabuhi.
Dugang niya nga ugmang adlawa, Nobyembre 2, pwede kaayo nga manimba ang katawhan, naandan nga paghalad og pamisa sa mga kalag, ingun man pag-ampo ngadto sa mga indibidwal nga nangamatay na.
