CEBU CITY- Giawhag ni Cebu Archbishop Alberto “Abet” Uy ang mga magtutuo nga dili mahadlok sa pagpaambit, bisan gamay lamang ang ilang ikahatag, kay ang tinuod nga milagro magsugod sa kasingkasing nga puno sa kaluoy ug pagkamanggihatagon.
Matud sa Arsobispo, subay sa Ebanghelyo bahin sa lima ka tinapay ug duha ka isda, wala gisugo ni Hesus ang iyang mga tinun-an nga pasagdan ang mga nanginahanglan, kondili giingnan sila, “Kamo mismo ang maghatag kanila ug pagkaon.”
Gipasabot ni Archbishop Uy nga daghan sa katawhan karon ang nag-antos sa lainlaing matang sa kagutom dili lamang sa pagkaon, kondili usab sa gugma, paglaom, direksyon sa kinabuhi, ug sa ilang relasyon sa Diyos.
Busa, iyang giawhag ang mga Kristohanon nga dili magtan-aw sa kagamay sa ilang ikatampo, kondili sa ilang kaandam sa pagtabang, kay ang Diyos mao ang mopadaghan sa tanang maayong buhat nga gihalad alang sa kaayohan sa isigkatawo.
Sa pagtapos sa iyang homili, nangamuyo usab ang Arsobispo alang kang Pope Leo XIV, sa mga lider sa nasod, sa mga biktima sa pagbaha, sa mga naapektuhan sa nagkataas nga kaso sa dengue, ug alang sa kalinaw sa Middle East.
