Giawhag ni Cebu Archbishop Alberto “Abet” Uy ang tanang magtutuo sa Archdiocese sa Sugbo sa pag-apil sa White Ribbon Movement March karong umaabot nga Domingo, Hunyo 28, 2026.
Matod sa arsobispo, ang maong kalihokan nga giorganisar sa nagkalain-laing relihiyosong grupo ug gipaluyohan sa Catholic Bishops’ Conference of the Philippines (CBCP) usa ka malinawon ug walay gidapigang partido nga pagpadayag sa tinguha alang sa kamatuoran, hustisya, ug maayong panggobyerno.
Nadasig usab niya ang katawhan sa pagsul-ob og puti nga senina o pagtaod og puti nga laso, ingon man ang pag-display niini sa mga balay, opisina, ug mga simbahan isip simbolo sa pagkontra sa korapsyon.
Gipasiugda sa pamahayag nga ang puti nga laso nagrepresentar sa pangandoy sa nasod nga mahimong gawasnon sa kawat ug pagpanglimbong sa kagamhanan.
Gawas sa pagsulob niini, nanawagan ang simbahan nga mag-ampo alang sa tiunay nga kausaban nga magsugod sulod sa kasingkasing sa matag usa.
Gidasig usab ang publiko nga bisan human sa maong adlaw, magpadayon unta ang pagkahimong mabinantayon, pagsalikway sa mga sayop nga impormasyon, ug pagpanubag sa mga lider sa nasod alang sa kaayohan sa tanan.
