Pangulohan ni Cebu Archbishop-Designate Abet Uy ang ipahigayon nga Mass Actions rally sa Probinsya sa Bohol karong domingo, Setyembre 21 sa Plaza Rizal sa dakbayan sa Tagbilaran.
Kini nunot sa mga imbestigasyon sa gikatahong korapsyon sa mga opisyal ug kontraktor sa gobyerno kalabot sa mga flood control projects sa nasud.
Mao kini ang gikumpirmar ni Atty. Antonio Amora Jr., ang Convenor, Bohol Initiative for Good Governance atol sa pakighinabi sa Bombo Radyo Cebu Newsteam, nga si Bishop Uy maoy usa sa mga manguna sa kalihokan.
Apan, gihangyo sa Bishop nga hinaot usa ka prayerful ug malinawon ang mahitabong rally samtang nagpahungaw sa mga gibati nga kasagmuyo.
Hinungdan nga paningkamutan sa convening group nga “LIHOK BOL-ANON BATOK SA KORAPSYON” nga masunod ang mga parameters ug dili kini masagulan og politikanhon ug partisan, hilabi na nga nagkandaiyang hugpo ang moapil, diin kasagaran gikan sa simbahan, civil society organizations, tunghaan ug uban pa nga adunay kaugalingong ideologies.
Busa, giawhag ang tanang mosalmat nga dili magdala og bisan unsang materyales nga makamugna og kagubot.
Gihimug-atan usab ni Amora nga ang himoon nga rally kay nagtumong nga magkahiusa ang katawhang Pilipino batok sa korapsyon.
