CEBU CITY- Gipasalamatan ni former CBCP President ug karon Cebu Archbishop Jose Palma ang Bombo Radyo Cebu.
Kini may labot sa pagpaabot niini sa Katoliko sa Siete Palabras o 7 Last Words niadtong Biyernes Santo sa Cebu Metropolitan Cathedral.
Sa mensahe sa arsobispo, nagpasalamat kini sa tanan tungod kay nagtoo siya nga ang nagkalain-laing pagtoo o repleksyon ang naghatag og mensahe sa matag tao.
Matud ni Archbishop Palma nga ang mga mensahe nga dala sa Siete Palabras ang naghatag og dako nga giya sa mga tao nga magpadayon nga maglakaw padulong sa Diyos.
Gihulagway usab sa arsobispo nga kitang tanan mga “wounded healers” kung diin kita ang gihimong instrumento sa Diyos para sa kapasaylo-an sa tibook kalibutan.
Gihimug-atan niini nga ang tao bisan paman og samdan makapangayo og ingon man makadawat gihapon og kapasayloan.
Samtang gihuman sa arsobispo ang iyang mensahe sa pinaagi sa usa ka pag-ampo kung diin gipangayo niini sa Diyos nga giyahan silang mga pari nga mas masabtan pa nila ang ilang gisulod sa bokasyon.
Gi-awhag usab niini ang mga pari nga manginabuhi og simple aron nga mas masabtan nila ang ang kinabuhi nga gisubay ni Hesu Kristo.
