Nipadayag og suporta si Cebu Archbishop Alberto “Abet” Uy alang kang Pope Leo XIV, taliwala sa mga pagsaway gikan ni Donald Trump nga nagpahugot sa tensyon tali sa Vatican ug sa Estados Unidos.
Sa usa ka pamahayag, miingon si Uy nga “makapaguol uyamot—ug sa daghang paagi, makatugaw” nga ang usa ka lider sa kalibutan mosulti og sakit batok sa Santo Papa.
Iyang gihatagan og gibug-aton nga ang Santo Papa dili usa ka politikanhong pigura kondili usa ka “moral ug espirituhanong magbalantay” nga gitahasan sa paggiya sa mga magtutuo ug pagpataas sa dignidad sa tawo.
Kini nga mga pamahayag miabot samtang nagkagrabe ang panagbangi tali ni Trump ug Pope Leo XIV human gisaway ang nagpadayong gubat sa Iran nga nakakuha sa atensyon sa tibuok kalibutan ug nagbahin sa mga lider sa politika ug relihiyon.
Giklaro sa Arsobispo sa Sugbo nga ang papel sa Santo Papa nakagamot sa konsensya, dili sa gahum, ug ang simbahan wala naglungtad aron makigkompetensya sa gahum, kondili aron magpamatuod sa kamatuoran.
Iyang gipasiugdahan nga ang tingog sa Santo Papa gituyo aron hagiton ang mga lihok nga moresulta sa pag-antos, kawad-on sa hustisya, ug panagbangi, inay nga makigbahin sa politikanhong panag-indigay.
