Gisugyot nga mag-istablisar og Community-based Rehab Program ang Kagamhanang Lalawigan sa Sugbo subay sa healthcare agenda ni Cebu Provincial Governor Pamela “Pam” Baricuatro ilabi na sa mga gilit nga mga dapit.
Gianunsyo kini nga inisyatiba ni Dr. Nikki Catalan, ang Provincial Health Consultant atol sa Community-Based Rehab Summit sa Cebu Capitol Social Hall niadtong nakalabayng Biyernes, Septiyembre 22, 2025.
Dugang pa ni Catalan nga dili lamang “curative” ang ilang healthcare agenda apan “rehabilitative” usab isip reporma sa natad sa serbisyong pampublikong panglawas ilabi na sa mga kabukiran ug sa mga isla.
Aron maimplementar kini, gitahasan ang mga Municipal Health Officers (MHOs) ug mga barangay health workers (BHWs) nga mupailawom og basic training sa rehabilitation therapy ug uban natad sa physiatry aron mutabang sa mga pasyente sa ilang pag-recover.
Lakip niini ang physical therapy para sa mga stroke survivors nga kansang nihit kaayu madalit nga mga rural nga mga komunidad.
Ang rehabilitation medicine o physiatry kay usa ka medical specialty nga naka-focus sa pagpahiuli sa function sa mga indibidwal nga baldado tungod sa sakit o pagkaangol nga nakaapektar sa ilang inadlaw-adlaw nga kinabuhi sa mga pasyente.
GItungahan ang summit sa mga local health officers, mga eksperto gikan sa Southwestern University Phinma ug Philippine Academy of Rehabilitation Medicine (PARM) kinsa kusog ang suporta sa programa.
Una nang gilusad kini sa mga lungsod og dakbayan sa Carcar, Consolacion, Argao, Ronda og gilauman nga matukod sab sa isla sa Bantayan ug Camotes, Balamban ug Oslob.
