CEBU CITY – Nipagawas og mando sa milabayng adlaw ang Inter-Agency Task Force for the Management of Emerging Infectious Diseases (IATF-MEID) kabahin sa mga lagda nga ipatuman sa umaabot nga lagda.
Sa paggawas niini, daghan ang nabalaka gumikan giplanohan na sa kagamhanan sa syudad Sugbo ang mga guidelines sa umaabot nga okasyon.
Human niini, nipahigayon og usa ka press conferrence si Acting Mayor Mike Rama aron sa paghisgot sa maong butang kung ipadayon pa ba ang pag-abli sa mga sam-ang ug menteryo sa umaabot nga Nobiyembre 1 ug 2.
Una, nibutyag kini nga magpabiling abli ang mga sam-ang apan milaum usab kini nga hatagan unta og konsiderasyon sa IATF ang kagustuhan sa syudad nga ma-abli ang mga menteryo sa maong mga adlaw.
Subay niini, eksklusibong gikahinabi sa Bombo Radyo Cebu si Acting Mayor Mike Rama aron hisgutan ang naasoy nga okasyon diin mibutyag kini nga nakigtabi na kini kang COVID-19 Chief Implementer Secretary Carlito Galvez, Jr.
Nagkanayon kini nga nindot ang nahimong panagstorya tali kang Secretary Galvez ug miingon kini sa mayor nga kung kaya sa syudad nga pagadumalaan, makontrol ug adunay limitasyon ang maong okasyon pwede ra kaayo kining ipadayon.
Basta siguroon lang sa syudad nga magtinabangay lang ang tanan lakip na ang mga konsehal, mga opsiyales sa gobyerno, barangay, simbahan apil na ang katawhan aron kapugngan ang subling pagsaka ug pagkuyanap sa kaso sa Covid-19.
Gipasabot usab ni Cebu City Acting Mike Rama ngadto kang COVID-19 Chief Implementer Secretary Carlito Galvez, Jr nga dugay rang giplanohan sa syudad ang mga lakang nga pagahimuon sa umaabot nga kalag-kalag.
Dugang pa sa mayor, nga uwahi rang nigawas ang mando sa Inter-Agency Task Force for the Management of Emerging Infectious Diseases (IATF-MEID) kabahin sa pagpasira sa mga sam-ang ug menteryo sa naasoy nga tinuig nga okasyon.
Gitataw usab niini, nga sa wala pa kini mopagawas og executive order sa oplan kalag-kalag nagpahigayon na kini og daghang panagpulong sa nagkadaiyang opisyal sa syudad ug sa barangay, mga ahensya ilabi na Emergency Operations Center ug sa simbahan aron masabotan pag-ayo ang mga lakang alang usab sa kaluwasan sa katawhan
Kahinumduman, nga nipagawas og lagda ang IATF sa pagpasirado sa tanang sam-ang ug menteryo sa tibuok nasod sugod Oktubre 29 hangtod sa Nobiyembre 2,2021.
