CEBU CITY-Maayo ang kasamtangan sitwasyon sa Cebu City Sports Center og naghuwat nalang kini sa finishing touches sama sa pagpintal sa mga linya alang sa pagpangandam niini sa umaabot nga 2024 Palarong Pambansa diri sa Sugbo sa umaabot nga Hulyo.
Kini ang pamahayag ni Cebu City Acting Mayor Raymond Alvin Garcia sa pakighinabi niini sa Bombo Radyo Cebu.
Giklaro usab ni Acting Mayor Garcia nga mikatap nga bersyon sa lain procurement para sa mga portalets ug portabaths nga ibutang sa mga nagkadaiyang billeting centers nga mubalor sa inisyal nga Php18-milyones.
Subay niya nga gilaslasan ang orihinal nga budget ngadto na sa Php5-milyones tungod kay aduna man daan 130 ka mga portalets si Cebu City Government og dugangan nalang kini sa 118 ka mga portalets ang abangan para sa umaabot nga Palarong Pambansa.
Dugang pa ni Garcia nga 95 porsento na ang gibana-bana nga kaandam sa dakbayan para sa naasoy nga national sporting event.
Giklaro usab niya ang posibilidad sa pagtambong ni Presidente Ferdinand Marcos Jr ug ni Bise Presidente Sara Duterte-Carpio apan wala kini midetalye para sa seguridad sa mga opisyal.
