Gisalikway sa Cebu City Council Niadtong Biyernes, Hulyo 3, ang sugyot nga pormal nga supakon ang plano sa Department of Transportation (DOTr) nga i-realign ang mga bahin sa proyekto sa Cebu Bus Rapid Transit (CBRT) padulong sa South Road Properties (SRP).
Ang gisugyot nga resolusyon, nga gipasiugdahan ni Bise Mayor Tomas Osmeña, wala maaprobahi human pito ka miyembro sa konseho ang mibotar pabor, duha ang mibotar batok, ug upat ang mi-abstain.
Misuporta sa lakang mao sila si Osmeña ug Konsehal Philip Zafra, Paul Labra, Michelle Abella-Celona, Sisinio Andales, Alvin Arcilla, ug Jose Abellanosa.
Wala usab mouyon sila si Konsehal Jun Alcover ug Harry Eran sa sugyot, samtang sila si Konsehal Dave Tumulak, Winston Pepito, Mikel Rama, ug Nice Archival ang mi-abstain.
Ang resolusyon nagtinguha nga himuong opisyal nga posisyon sa Konseho sa Dakbayan sa Sugbo nga gisalikway niini ang gisugyot nga realignment sa DOTr ug gipadayon ang orihinal nga Bulacao-to-Talamban corridor isip prayoridad sa proyekto.
Nangatarungan si Osmeña nga ang Dakbayan sa Sugbo, dili ang National government ang adunay awtoridad sa pag-aprobar o pagsalikway sa mga pagbag-o sa CBRT alignment.
Gipadayon niya nga ang pag-awhag lang sa DOTr sa pagsalikway sa proposal dili makapugong sa ahensya sa pagpadayon sa gibag-o nga alignment.
Sumala ni Osmeña, ang Bulacao-Talamban corridor angay nga magpabilin nga sentro sa proyekto tungod kay kini ang alignment nga giaprobahan atol sa pagplano, konsultasyon sa publiko, ug ang internasyonal nga proseso sa pagpondo sa proyekto.
Ang gisugyot nga resolusyon miabot human sa mga adlaw nga debate taliwala sa mga miyembro sa konseho kung ang pagpalapad sa BRT ngadto sa SRP makapahuyang o makadugang sa orihinal nga corridor.
