Miduso og ordinansa ang Cebu City Council nga magsilot sa mga establisemento sa negosyo nga mapakyas sa paghatag sa mga kustomer sa saktong sukli.
Gipasiugdahan ni Cebu City Councilor Harold Kendrick Go, ang mao nga lakang, niadtong Setyembre 23, 2025, hugot nga gidili ang sayup nga pahatag sa sukli sa bisan unsang paagi.
Mibutyag si Go, nga ang City Government kinahanglang mopatigbabaw sa kaayohan sa mga konsumidor pinaagi sa pagsiguro nga ang mga kustomer makadawat sa eksaktong sukli sa tanang komersyal nga transaksyon.
Giila ang maong ordinansa nga “Anti-Shortchange Ordinance of Cebu City,” nga nagtinguha nga mapanalipdan ang mga katungod sa panalapi sa mga konsumedor samtang nagsuporta sa pamatasan sa negosyo.
Silotan ang unang paglapas pinaagi pagpadalag suwat ug mandatoryo nga pagpatambong sa consumer rights orientation.
Pabayron usab ug Php 1,000 ug isyuhan og citation ticket ang makalapas sa ikaduhang higayon, samtang Php 3,000 ang ipamulta ug suspensohon ang business permit sa maong establisemento nga nakalapas sa ikatulong higayun.
Pamultahon usab og P5,000 nga multa ug mahimong irekomendar sa pagbakwi sa business permit ang sunod-sunod nga makalapas.
Gitahasan sa pagmonitor ug pagpatuman ang Business Permit and Licensing Office (BPLO) ug makig-alayon sa Department of Trade and Industry (DTI) ug sa Cebu City Market Authority, ilabi na sa mga merkado.
Mahimong mopasaka og reklamo ang mga konsumidor pinaagi sa BPLO, DTI Cebu City Field Office, Barangay Business Help Desks, designated online portals, o sa Office of the SP Chairman, Committee on Trade, Commerce and Entrepreneurship.
