Nakauyon si Cebu City Councilor Jun Alcover kabahin sa pamahayag nga gipagawas ni Cebu City Mayor Nestor Archival nga iyang isalikway ang sugyot sa pagpasaka sa financial assistance sa mga senior citizen.
Atol sa ekslusibong pakighinabi sa Bombo Radyo Cebu newsteam kaniya, iyang gikabutyag nga miuyon siya karong higayona sa desisyon sa Mayor gumikan kay alang kaniya, dili pa saktong panahon nga sakahan ang tabang pinansyal sa mga katiguwangan kay daghan pa ang mga wala pa makaapil.
Gidugang niya nga sa maong kasamtangang kantidad, dili na malugi kung huna-hunaon ang mga senior citizen.
Sa pikas bahin, sa hisgutanan usab sa pamaagi sa pagpanghatag sa tabang pinansyal sa mga katiguwangan kung binuwan ba o tiningub, diin alang kang Alcover, wala siya makasabot sa pangutok ni Mayor Archival og nganung gibinuwan ang pagpang apod-apod sa hinabang.
Gitataw sa maong konsehal nga dili kini makiangayon sa mga katiguwangan sa daghang mga anggulo sa maong lakang sa mayor.
