CEBU – Nilaum si Cebu City Councilor James Cuenco, ang chairman sa committee on transportation sa dakbayan sa Sugbo, nga mapasar ang ordinansa nga iyahang giduso nga nagtinguha nga makabaton ang dakbayan sa Sugbo og kaugalingong driving school.
Matod pa ni Cuenco nga usa sa nakapa-aghat kaniya sa pagduso sa maong ordinansa mao ang bag-ong pinakabag-ong memorandum sa Land Transportation Office (LTO) nga nagpahibawo nga dili na modawat og aplikasyon sa students permit kung wala moagi og theoritical driving.
Dugang sa opisyal nga human sa maong memorandum, nagpaturagas na ang pipila ka driving school sa pagpasaka sa ilahang mga tuition.
Tinguha sa bag-ong lakang ni Cuenco nga matubag ang taas nga gasto sa mga pribadong driving school, nga makapugong sa pipila ka mga lungsoranon sa dakbayan sa Sugbo sa pagpa-enrol sa ilang kaugalingon.
Samtang wa pa mapatuman ang gisugyot nga driving school ni Cebu City Councilor James Anthony Cuenco, ubay-ubay sa mga konsehal ang nisugyot sa pagtanyag og scholarship sa mga tawo nga dili maka-afford sa pagkuha og driver’s license.
