Hinay-hinay na og balhin ang Cebu City Court sa Cebu City Quarantine Center (CCQC), kini human gideklarar sa Korte Suprema ang Quimonda nga dili na luwas gumikan sa pagkaguba sa istruktura tungod sa magnitude 6.9 nga linog.
Gikumpirmar ni Mayor Nestor Archival nga personal nga nibisita sa dakbayan sa Sugbo ang mga opisyal sa Office of the Court Administrator (OCA) sa Korte Suprema ug nangayo og tabang sa pagpangita og temporaryo nga lugar aron ipadayon ang operasyon sa korte.
Ingon man nga human sa pagsusi ug nakompirmar nga dili gayud magamit ang Qimonda kay nihangyo sila nga mogamit una sa CCQC.
Matod ni Archival nga uyon siya nga temporaryong gamiton sa hudikatura ang CCQC, nga nahimutang sa South Road Properties (SRP), nga nagtanyag og dako ug luwas nga lugar nga haom sa operasyon sa korte.
Matud usab ni Judge Theresa Estoesta, Supreme Court Administrator, adunay 24 ka Regional Trial Courts ug 14 ka first-level courts, lakip ang duha ka clerk of courts ang kinahanglan nga ibalhin sa luwas nga lugar aron makahibalik sa court operation, ingon man nga short-term plan lang kini nga lakang.
Gidugang niini nga ang hudikatura nagtumong sa paglihok sa CCQC sulod sa usa ka bulan, nga nagtugot sa normal nga operasyon sa korte nga ipadayon sa usa ka luwas nga kahimtang.
