Gihugtan ang pagpangampanya sa Cebu City Disaster Risk Reduction and Management Council batok sa illegal nga pagpangisda, hinungdan nga nasikop ang gi-ingung siyam-ka kahon nga gisudlan sa mga isda nga gikataho gigamitan ug dinamita atol sa market denial operation sa C. Padilla St.
Gibana-bana nga mo balur ug P72,000 ang nakuha tungod sa mga kalapasan nga naglakip sa illegal fishing ug misdeclaration of commodities niadtong Huwebes, Mayo 15, 2025, matod ni Ramil Ayuman, pangulo sa Cebu City Disaster Risk Reduction and Management Council.
Matud pa sa mga awtoridad, nga ang mga nasakmit nga isda nakalapas sa mga balaod batok sa ilegal nga pagpangisda ug sayop nga pagdeklara.
Ubos sa kasamtangan nga mga regulasyon, ang mga makalapas mag-atubang og silot nga 5-ka pilo sa balor sa merkado. Niini nga kaso, mokabat sa P360,000 ang multa.
Gikonsiderar man nga first offense, gipahamtangan og 30 porsiyento nga diskwento, nga mius-os sa kantidad ngadto sa P252,000.
Gihimug-atan sa pangulo sa Cebu City Department of Veterinary Medicine and Fisheries nga si Alice Utlang, ang kapeligrohan nga dala sa dynamite fishing, nga nagpasidaan nga makaguba sa mga pangitlogan sa isda ug makadaot sa mga gagmayng isda, nga mahimong mosangpot sa pagkunhod sa gidaghanon sa mga isda sa kadagatan.
Dugang usab niini nga ang dynamite fishing makadaot sa mga coral reef ug miawhag sa mga mananagat sa paghunahuna sa epekto sa ilang mga aksyon sa kinaiyahan ug sa umaabot nga mga henerasyon. | Bombo Nathaniel Sandoval
