CEBU CITY-Daling midalit og hinabang sa mga biktima sa sunog nga miulbo sa Sitio Isla Alegre, Barangay Basak San Nicolas, dakbayan sa Sugbo niadtong kadlawn sa Dominggo, Oktubre 27, 2024.
Sa eksklusibong pakighinabi sa Bombo Newsteam kang Portia Basmayor, ang pangu sa Cebu City Department of Social Welfare and Services diin gipahayag niini nga ang mga biktima sa maong sunog o mas giila sa ilang buhatan nga Internally Displaced Families and Individuals (IDPs) kay kasamtangang gipahimutang sa Basak Community School sulod sa 12 ka lawak niini.
Gidalitan kini sila og mga init nga pagkaon, atensyon medical nga gidalit sa Cebu City Health Department, ug mga Barangay staffs and officials para sa uban pang panginahanglunon.
Sa pinakaulahing datos nga giluwat sa DSWS, adunay 180 ka mga panimalay ang naapektuhan sa katalagman, 723 ka mga indibidwal sulod sa 181 ka mga pamilya ang gi-bawkit.
Dugang pa ni Basmayor nga posibling mukunhod ang gidaghanon sa mga bakwit tungod pipila niini ga boarders o nangabang lang og mamalik sa ilang permanenting pinuy-anan gawas sa dakbayan.
Aduna na sab mga indibidwal o grupo nga midonar sa mga biktima ilabi na sa mga sinena, habol, ug undergarments nga bag-o nga hilabihang gikinahinanglan sa mga bakwit.
