CEBU CITY-Dili pa makakumpirmar ang Department of Veterinary Medicine and Fisheries nga aduna na’y nakasulod nga African Swine Fever (ASF) sa dakbayan sa Sugbo.
Gibutyag ni Dr. Jessica Maribojoc, ang pangulo sa Cebu City DVMF, nga sa nakalabay nga buwan sa Enero ug Pebrero kay nag-negatibo man sa ASF ang mga blood sample sa mga baboy nga nangamatay, apan giingong dili sa gihapon angayan nga mag-kumpyansa.
Matud pa, posibli nga sa mga nakalabay nga adlaw kay adunay nakalusot nga buhi o karne sa baboy gikan sa Carcar City pasulod dinhi sa dakbayan sa Sugbo.
Gitino ni Maribojoc nga wala pa may deklarasyon gikan sa kaulohan nga positibo sa ASF ang dakbayan sa Sugbo hinungdan nga dili una kini makakumpirmar sa maong taho.
Sa pagkakarun, padayon ang ilahang monitoring ilabi na ang mga baboy nga pasulod sa dakbayan sa Sugbo, diin ilahang gisiguro nga dili kini gikan sa dakbayan sa Carcar.
Giklaro ni Dr. Maribojoc nga nagpabilin nga anaa pa sa ‘green’ o safe zone ang dakbayan sa Sugbo.
