CEBU CITY — Dili layo nga ipaubos pagbalik sa lockdown ang dakbayansa Sugbo kung motaas pagbalik ang kaso sa Coronavirus Disease (COVID-19).
Kini ang gibutyag ni Emergency Operations Center Chief, Cebu City Councilor Joel Garganera diin gikonsiderar niini nga ‘alarming’ ang laing nadugang nga kaso sa nataptan sa coronavirus diin basi sa case bulletin nga gipagawas gahapon sa Department of Health (DoH-7) adunay 28 ka bag-ong kaso sa COVID-19 ang natala sa dakbayan sa Sugbo.
Taas ang maong ihap kung itandi sa gidaghanon sa mga bag-ong naka-rekober nga anaa lang sa 14 ka indibidwal.
Subay niini gi-awhag sa opisyal ang publiko ilabi na sa mga trabahuan nga mo-comply sa mga health protocols sanglit nigawas sa datos nga mas taas ang transmission sa virus sa gawas sa panimalay.
Una na usab nga gibutyag ni DoH-7 spokesperson ug Chief Pathologist Dr. Mary Jean Lorreche nga hinay-hinay nang na-contain ang transmission sa coronavirus sa community level ug gipahimangnuan niini ang mga trabahu-an nga istriktong ipatuman ang minimum health standards aron dili mamahimong carrier sa virus sa komunidad. (GBS)
