CEBU CITY- Gipaubos sa state of emergency ang usa ka elementarya sa bukirang barangay sa Buhisan, dakbayan sa Sugbo nunot sa nadiskobrehan nga mga liki sa yuta ug kahuyang sa estruktura.
Ang deklarasyon makapadali sa pagpagawas sa mga pundo sa katalagman aron matubag ang mga kabalaka sa kaluwasan nga mahimong maglakip sa panginahanglan sa pagpatuman sa mga pagbag-o sa school building nga dili kinahanglan nga moagi sa naandan nga proseso sa bidding.
Si Mayor Raymond Alvin Garcia niingon nga isip long-term nga plano, mahimong makahukom ang kagamhanan sa dakbayan nga ibalhin ang tunghaan sa laing lugar.
Sa pakighinabi sa Bombo Radyo Cebu Newsteam kang Architect Florante Catalan, hepe sa Cebu City OBO, gikompirmar niini nga gipahibalo sa Cebu City Office of the Building Official (OBO) nga dili na magamit ang building sa Buhisan Elementary School tungod sa mga kadaot nga nadiskobrehan didto.
Kini tungod kay ang building gideklarar nga “delikado” o high risk niadtong Oktubre 2024.
Base sa obserbasyon sa OBO, nasuta nga dunay dagkong mga liki sa tunghaan.
Matud ni Catalan nga daghang butang ang angay konsiderahon sa pagtukod og building sa Buhisan, apil na niini ang pagtan-aw sa kalidad sa yuta ug paghimo niini nga eskwelahan ngadto sa mga batan-on sa maong lugar.
