CEBU CITY — Gipaubos na sa state of calamity ang dakbayan sa Sugbo subay na outbreak sa coronavirus disease o COVID-19.
Kini human nga gi-aprubahan kagahapon sa konseho sa dakbayan, pinaagi ni Vice Mayor Michael Rama, ang maong deklarasyon.
Tungod niini, gisuspenso ni Mayor Edgardo Labella ang klase sa tanang lebel sa publiko ug pribadong tunghaan sa Cebu City karong Marso 16 ngadto na sa 28.
Nadesisyunan kini human mipahigayon og panagsabot sa mga stakeholders.
Mi-awhag karon si Labella sa mga pribadong establisimento nga magbaton og therman scanning device aron masuta ang temperatura sa lawas sa dili pa makasulod sa City Hall.
Mitambag usab ang mayor sa publiko nga mag-amping ug magpabiling kalmado.
‘Walay klase sa Metro Cebu’
Samtang mipahibalo usab ang Lapu-Lapu City Government nga suspendido ang klase sa tanang levels sugod karon sa tanang publiko ug pribadong tunghaan.
Walay klase usab sa dakbayan sa Talisay gikan sa pre-school ngadto na sa highschool, pribado man o public schools, subay na sa anunsyo ni Mayor Gerald Anthony “Samsam” Gullas.
Gisuspenso usab ni Cebu Provincial Governor Gwendolyn Garcia nga walay klase sa preschool, elementary, ug highschool sugod karong Lunes.
Suspendido usab ang klase sa dakbayan sa Mandaue sa tanang levels sa publiko ug pribadong mga tunghaan. (with reports by Star FM Cebu)
