Gisulong karon sa kagamhanan sa Dakbayan sa Sugbo ang pag-upgrade sa Citizen Action Center (CAC) nga mobalor og P10.25 milyunes. Kini nga proyekto nagtumong nga i-sentralisado ang tanang reklamo, hangyo, ug feedback sa publiko ngadto sa usa ka digital platform aron pulihan ang nagkatag nga reporting channels sa siyudad.
Pinaagi niini, ang mga report gikan sa hotlines, social media, email, ug walk-in hiusahon na sa usa ka AI-enabled nga sistema diin ang mga Sugboanon makasubay na sa status sa ilang mga mulo sa real-time.
Gipangamahan ni Konsehal Edgardo “Jaypee” Labella, tsirman sa committee on information and communications technology (ICT), ang maong resolusyon atol sa regular session niadtong Pebrero 3, 2026. Matod ni Labella, gikinahanglan ang modernisasyon sa frontline services aron mahiuyon kini sa ePayment Ordinance ug uban pang digital nga inisyatiba.
Ubos sa bag-ong sistema, ang matag report hatagan og digital ticket number nga ma-access pinaagi sa web, mobile devices, o chatbot sama sa Facebook Messenger, ug gipaabot nga mo-operate kini og 24 oras matag adlaw sa nagkalain-laing pinulongan.
Ang Office of the Mayor maoy magsilbing overall implementing office samtang ang Management Information and Computer Services (Mics) maoy mohatag og technical oversight. Ang Mics ang gitahasan sa paghimo sa technical specifications, pagseguro sa security evaluation, ug pagsunod sa nasudnong ICT standards.
Ang maong proyekto gidesinyo nga awtomatikong mopaabot sa mga reklamo ngadto sa mga hingtungdan nga departamento aron masiguro ang paspas nga serbisyo subay sa Republic Act 11032, o ang Ease of Doing Business and Efficient Government Service Delivery Act.
Gawas sa CAC, giaprobahan usab ang P5.3-milyunes nga upgrade sa Cebu City Government web portal nga magsilbing “online version” sa City Hall. Kini nga portal maglakip sa tanang serbisyo, forms, anunsiyo, ug payment gateways nga dali rang ma-access pinaagi sa cellphone o computer.
Ang tibuok sistema gilauman nga mahuman sulod sa 24 ka semana, lakip na ang development ug testing, diin seguraduhon usab sa Mics ang cybersecurity ug pagsunod sa Data Privacy Act aron mapanalipdan ang impormasyon sa publiko.
